मुंबई : टीव्ही मालिकेमुळे केवळ मनोरंजनच होत नाही, तर चाहत्यांची स्वप्नही पूर्ण होऊ शकतात. नंदूरबारच्या प्रीती नांद्रे या चाहतीनं नुकताच हा सुखद अनुभव घेतला. स्टार प्रवाहच्या ‘छोटी मालकीण’ या मालिकेनं प्रीती यांना मानाचा सोन्याचा हार मिळवून दिला, सोबतच रेवती आणि श्रीधर या जोडीला भेटण्याची संधीही त्यांना मिळाली.
या मालिकेसाठी एक स्पर्धा घेण्यात आली होती. यात अचूक उत्तर देणाऱ्याला मानाचा सोन्याचा हार जिंकण्याची संधी देण्यात आली होती. या स्पर्धेला महाराष्ट्रातून प्रचंड प्रतिसाद मिळाला. त्यात नंदूरबारच्या प्रीती नांद्रे भाग्यवान विजेत्या ठरल्या.
‘‘छोटी मालकीण’ ही मालिका मला फार आवडते. ही कॉन्टेस्ट जाहीर झाल्यावर मी त्यात सहभागी व्हायचं ठरवलं आणि उत्तर दिलं. मात्र, मला बक्षीस मिळेल याची अपेक्षाच नव्हती. मानाचा सोन्याचा हार मिळणं हे माझ्यासाठी खरोखरच आनंददायी आहे. हा आनंद दिल्याबद्दल ‘छोटी मालकीण’ची मी आभारी आहे’, अशी भावना प्रीती नांद्रे यांनी व्यक्त केली.
सोमवार ते शनिवार रात्री नऊ वाजता स्टार प्रवाहवर ही मालिका प्रसारित होते.